Home | Databases | WorldLII | Search | Feedback Island Courts of Vanuatu

  Download original PDF

Masarei v Malu [2005] VUIC 8; [2005] VUICB 4; Land Case 10 of 1984 (4 November 2005)

IN THE EFATE ISLAND COURT
OF THE REPUBLIC OF VANUATU
(Civil Jurisdiction)

Land Case No. 10/84

BETWEEN:

CHIEF MASEREI
Original Claimant

AND:

FAMILY MALU
Claimant No. 1

AND:

PETER MARIPOPONGI
Claimant No. 2

AND:

CHIEF HENDRY MANLAEWIA
Claimant No. 3

AND:

FAMILY KALRONGO & TANOMIALA
Claimant No. 4

Efate Islan Kot ibin staon long Paunagisu, Not Efate, stat long namba 17 August, 2005 kasem 27 August, 2005. Hemia blong harem lan dispiut we ol patis oli mekem forom smol island blong Kakula. Jif Maserei wetem Alick Tamara tufala nao istap kleim se tufala nao ikastom ona blong Kakula. Folem kleim blong olgeta ia igat narafala familis tu oli mekem. kaonta kleim blong olegeta. Olgeta ia igat famili Malu, famili Peter Maripopongi, family blong Jif Henry Manlaewia mo ol traebs blong hem, famili Kalrongo mo family Tanomiala. (Vamele).

Ol jastises we oli harem dispiut ia

Igat 3 jastises mo wan Magistret nao oli harem dispiut ia. Hemia ifolem nomo wan loa we istap anda long Islan Kot Ak we hemi seksen 2(A) (1)(2) mo seksen 3. Ol ia seksens istap talem se sapos igat dispiut long wan kastom lan mbae wan Magistret wetem 3 jastises nao bae oli harem. Desisen we oli tekem mbae iblong olgeta everiwan.

Wanem nao kot istap lukluk long hem blong jasem dispiut ia

Blong jasem kes ia Kot ino save usim ol loa blong ol waetman. Mbae kot iusim nomo ol kastom blong ol man Efate. Ol kastom stori ia hemia ol stori we italem aot ol kastom histri blong olgeta osem blat laen, ol relesen wetem ol pupu man mo woman bifo ikam mo ol narafala kastom histri bakeken we irelet long ol pleses we istap long dispiut.

Famili Blong Jif Maserei-Orijinol Kleiman

Ol famili blong jif Maserei, we olgeta nao oli iriginol kleiman, oli kivim evidence blong olgeta fastaem. Bifo oli kivim evidence olgeta ibin mekem 2 applikesen ikam. Faswan nao se, Magistret Jerry Boe, imas diskwalifaem hem forom se hem igat sam famili koneksen wetem sam long ol patis long kes ia. Seken applikesen nao se kot imas straekem aot kes ia forom se wan Franis kot ibin desaed finis se jif Maserei nao h emi lan ona blong Kakula Islan. Afta kot ibin lukluk long fasfala aplikesen kot ifaenem aot se aplikesen ia inogat graons long hem forom se, Magistret Boe, ino staon hem wan blong harem lan dispiut ia. Igat hem mo ol narafala 3 jastises nao oli harem kes ia mo desisen we mbae kam aot bae hemi wan kolectif desisen mo ibes long ol kastom blong ol man Efate. Long saet blong seken aplikesen kot iwandem talem se aplikesen ia tu kot ino save akseptem forom se jadgmen we Franis kot imekem hemi long saet blong registresen nomo be jadgmen ino talem se jif Maserei nao hemi lan ona. Antap long hem kot ifaenem tu se jif Maserei ibin salem Kakula iko long Mcloud we hemi wan waetman mo agent blong SFNH be kot ineva talem se jif Maserei hemi lan ona long Kakula. Narafala resen nao se taem we Vanuatu ikam independent hemi gat wan Konstitusen blong hem mo Kosnstitusen ia italem se everi lan long Vanuatu hemi blong ol man Vanuatu wetem ol desendens blong olgeta. Konstitusen italem tu se ol dispiut blong lan imas be desaeded akording long rul blong kastom blong Vanuatu. Forom resen ia nao kot istap talem se hem ino save akseptem aplikesen blong sakem aot kes ia.

Brif histri blong famili Maseri

Famili Maserei istap talem se hem iona blong Kakula island folem nomo wan jadgmen we wan Franis Kot ibin mekem bifo independens hemia long 1980. Jadgmen ia olgeta istap kleim se jif Maserei nao istap salem Kakula iko long wan waetman we hemi Mac Loud long behaf blong SFNH hemia long 1884. Olgeta istap talem se long taem blong sel ia igat Jimmy Maserei wetem narafala jif bakaken we hemi Masusu tufala nomo istap long kakula long taem ia. Forom resen ia nao olgeta istap talem se Kukula hem blong jif Maserei.

Fas witnis blong Jif Maserei-Alick Tamara

Fas witnis istap talem se jif Masarei nao ikastom ona blong Kakula island. Resen forom se olfala jif Tapanga Mara Masarei nao ibin salem Kakula iko long wan waetman long 1884, hemia folem wan Sales Act blong 25 Januari 1884 mo oli registerem long 12 Eprel, 1884. Hemi talem tu se long yia 1930 ol man Birioso, wan vilij long taem ia, olgeta ibin oposem registresen ia mo long 1930 kot ibin staon blong harem kes blong oposisen blong registresen blong Kakula. Witnis italem se long taem ia kot ibin dismisim aplikesen blong olgeta oposisen. Witnis italem tu se resen whae hemi rilae long jadmen ia forom se stat long 1884 kasem tedei inogat complain or documens we isoem se jif Maserei ibin salem Kakula we ino properti blong hem. Hemi talem tu se jadgmen blong Joint Kot isemak olsem Supreme Kot blong tedei mo island kot ino save ko bak mo harem wan desisen blong superia kot.

Long saet blong kros-examinesen kwesten we ikam long spokesman blong famili jif Manlaewia se baondari blong Maserei istat whea mo finis whea witnis ise hem ino save. Mo tu se wanem relesensip nao Maserei wetem Masusu tufala igat witnis iansa tu se hem ino save. Hemi talem tu se hem ino save weta Kakula istap anda long Namarakiana blong Paunagisu be hemi save nomo se long 1984 ibin gat wan fas nekosiasen forom Kakula we olgeta komuniti blong Paunagisu wetem Pele nao oli pat long hem.

Long saet blong re-examinesen, witnis ikonfimem bakaken se Act of Sales we ihapen long 1884 hemi tru.

Long saet blong kros-examinesen we ikam long spokesman blong famili Maripopongi se long kastom blong Efate igat 2 seperet fasin blong kleimem raet hemia jifly taetol mo lan mo wanem raet nao Maserei istanap long hem blong kleimem Kakula. Long kwesten ia witnis ise hem ino save. Witnis italem tu se hem ino save weta pupu blong hem ibin salem wan smol pat blong Kakula nomo or whol island.

Long wan kros-examinesen kwesten bakeken we ikam long spokesman blong famili Malu se tufala pasis ia we istap long Pele mo Nguna hemia Eles mo Worariki weta olgeta ia oli releted long Maserei mo witnis ise hem ino save. Hem italem tu se hem ino save weta pupu blong hem Maserei ibin dil daerectly wetem SFNH blong salem Kakula or nogat. Long saet blong wan kwesten se whea nao long jadgmen we itokbaot se Maserei hemi lan ona blong Kakula witnis ise hem istap rifer nomo long deed of sale blong 1884.

Long saet blong re-examinesen witnis ikonfimem se Act of sale Masusu nao ibin witnisem mo wan waetman.

Long narafala kros-examinesen kwesten we ikam long spokesman blong famili Kalrong se wanem famili laen nao witnis istap folem mo witnis ise hem istap folem man.

Namba 2 winis blong orijinol kleiman-John Roy

Witnis ia istap talem se hem iagri se Kakula island iblong pupu blong hem Tapangamara Maserei hemia folem wan Act of Sale blong 1884. Hem ise hem isave pruvum sale ia afta long wan kot kes long 1930.

Long saet blong kros-examinesen spokesman blong Chief Manlaewia iaskem witnis sapos hem isave pruvum baondari blong Kakula. Long saet ia witnis ise hem ino save nomo se Pele wetem Birioso igat koneksen long muvmen blong Tapangamara. Bakeken spoksman blong famili Maripopongi iaskem se wanem kastom belif nao Maserei igat long Kakula mo long saet ia witnis ise hem ino save mo hem italem tu se hem ino save whea ples mo yia nao Maserei ibin ordained. Long narafala kwesten se sapos long kastom blong Efate woman isave kam jif mo witnis iansa se 'no'. Wan kwesten tu ikam long spokesman blong famili Malu se wanem nao witnis isave mekem blong pruvum se Kakula iblong Jif Maserei. Long saet ia witnis ise hemi igat Act of Sale blong 1884 blong pruvum. Long saet blong kleim blong hem witnis ise hem istap kleim long saet blong blat laen mo hem iagri tu se ol baondari blong Kakula ifolem lan mak. Long saet blong osean we iseperetem Kakula mo Pele witnis ise hemia iosean nomo mo ino wan lan mak. Witnis italem tu se long saet blong stori blong jif Maserei long Pele hem ino save be hem isave nomo wan tapu storian blong hem we ireleted iko long wan shark. Hem italem tu se hem ino save hamas yia nao Jimmy Maserei ibin rulum Kakula mo hem ino save pruvum tu ol lan mak blong hem long Kakula. Long saet blong wan kwesten we ikam long spokesman blong famili Kalrong se sapos witnis isave talem se ibin gat wan sale blong Kakula long 1700s witnis ise 'yes' hem ibin harem be hem istap kleim nomo long wan kot kes blong 1930.

Family Maalu

Long saet blong famili Maalu Spokesman, Titus Taripu, italem se olgeta istap kleim thru long blat laen long saet blong matrilineal mo patrilineal be ino thru long nakainaga (clan). Hemi talem se Kakula ineva konekted wetem Emau, Nguna or Pele be hemi ipat blong Efate. Hem ise Kakula mo Malasaliu iwan eria or namarakiana we baondary blong hem itivaetem namarakiana blong Tanomiala mo hemia blong Emua. Hemi talem se migresen blong ol forefaters blong olgeta long Malasaliu iko long Kakula nakamal blong olgeta nao iakomodatem olgeta. Hemi talem se jif Jimmy Tapangamara Maserei we isalem Kakula Rev, Peter Milne ibin traem blong mekem se mane ia imas ko bak long ol han blong ol waetman. Hemi kontiniu blong talem se ol pupu blong olgeta ibin bon long Kakula mo kaltivetem lan long plesia.

Fas witnis-Edward Kaloris

Afta hem itekem oath blong hem spokesman ibin askem hem sam kwesten. Hem italem se ol Misenereies oli kolem Kakula olsem wan santuari mo long taem bifo, olsem ol pupu blong olgeta italem, Kakula mo Efate iwan graon nomo mo wan shalo wata nomo itivaetem tufala. Witnis italem se Kakula istap insaet long baondari blong Malasaliu mo kastom nakamal we ilukaotem Kakula istap insaet long baondari blong Malasaliu. Inogat wan kastom nakamal long Kakula. Witnis italem se taem we ol famili blong olgeta mo sam narafala famili oli stap long Kakula sam long olgeta ibin kam bak long main lan mo brebrekem ol idols we oli stap long Malasaliu mo Tanomiala. Hem italem tu se long Kakula igat man Efate nomo be igat wan man Pele nomo we istap tetaem we hemi Joseph Masogomabula blong Worearu. Hemi talem se storian blong Jimmy Maserei hao hemi salem Kakula hemia ifolem nomo wan rabis dil blong hem wetem Capt. Donald Macleod long wan boat taem we hemi drong. Witnis italem se Jif Jimmy Tapangamara Maserei ibin wandem tekem mane ia mo kivim long ol pupu blong hem be olgeta irefusem mane ia. Witnis italem se forom sale ia nao mo ol kaen fasin blong ol Franis man bifo mekem se ol man imuv bak long main lan mo setem ap Paunagisu we tedei istap. Hemi konfemem long statemen blong hem tu se Jif Manlaewia blong tedei istap insaet long famili tri blong olgeta.

Long saet blong kros-examinesen we ikam long spokesman blong famili Jif Manlaewia se whea nao long Kakula witnis isave shoem se ol pupu blong hem ibin stap long Kakula bifo. Long kwesten ia witnis ise Kakula istap long baondri blong Malasaliu. Narafala kwesten ikam long spokesman blong Maripopongi se sapos witnis isave talem hamas ol pipol nao oli ko long Kakula long taem blong migresen mo witnis ise ino bitim 30 pipol. Long kwesten se sapos witnis isave shoem long famili tri blong hem se whu nao ibin ko long Kakula hemi se Toaralesa mo Toarasariamata. Long saet blong kwesten se sapos witnis isave shoem whea ples nao nakamal blong hem istap long Kakula witnis ise 'yes' bae hem isoem long taem blong wokbaot. Witnis ikonfemem tu se papa blong hem ibin wan jif mo nem blong hem Mantaura. Tim Teo, Spokseman blong famili Maserei ibin askem witnis se Malu ifolem man or woman mo long kwesten ia witnis ise hemi wan naflak mo hem iagri tu se jif ibin stap bifo naflak ites kam. Witnis iagri tu se ibin gat wan sale we itek ples long 1883 mo long 1870. Spokesman blong famili Kalrong ibin askem witnis sapos hem isave explenem forom wanem ol descedans blong Toarasariamata oli no stap tugeta blong mekem kleim blong olgeta. Long saet ia witnis ise hemi tru olgeta ino stap tugeta be olgeta istap kleim under long wan nem ia nomo we hemi Malu. Long narafala kwesten se long kastom blo Efate hao nao yumi save kleimem graon witnis ise long blat laen mo long saet blong man.

Nambatu 2 witnis-Kalmaire Kalmar

Witnis italem se hem papa blong hem Kieth Kalmar mo pupu blong hem Pastor Tom Kalmar. Hemi talem se Tom Kalmar hemi only son blong Toaralesa mo Toaralesa brata blong hem Toarasariamata we hemi gret gret granfata blong Edward Kaloris. Witnis italem se olgeta oli wan famili nomo mo olgeta ikam aot long jif Lakelewia we hemi brata blong jif Manlaewia tufala ia ijif blong namarakiana blong Malasaliu we Kakula istap insaet. Witnis ise hem istap difendem heritage blong ol pupu blong hem hemia thru long patrilineal blat laen. Hemi talem se gret granfata blong hem Toaralesa hem tu ibin pat blong migresen we iko long Kakula long 1800s.Hem ise gret granfata blong hem ia itet istap long Kakula. Hem italem tu se granfata blong hem Pastor Tom Kalmaire ibin bon mo krewap long Kakula mo kam bak long mein lan. Witnis ise nem blong nakamal blong ol pupu blong hem long Kakula hemi Silimau and nakamal istap long Efate.

Long saet blong kros-examinesen spokesman blong Jif Manlaewia ibin askem witnis se whu nao iparamaon jif Lakelewia or jif Manlaewia. Long kwesten ia witnis ise ino gat paramaon jif be olgeta oli jif blong lukaotem ol pipol nomo. Afta long ansa ia witnis ibin jensim tingting blong hem bakeken taem we spokesman blong famili Maripopongi ibin askem hem sem kwesten ia mo hem italem se Lakelewia nao iparamaon kif. Witnis italem tu se Toarasariamata hem tu ibin witnisim ol sale ia long 1884. Long saet blong kwesten se Maripopongi nao ifas man long Kakula witnis ise hem ino save. Long wan kwesten we ikam long spokesman blong Masarei se wanem relesensip nao witnis igat wetem Margaret we hemi spokeswoman blong jif Manlaewia. Long kwesten ia witnis ise hem istret anti blong hem mo tedei hem itekem joice blong hem blong stap wetem jif Manlaewia. Long saet blong kwesten se whu ia ol generesen blong hem we oli ko long Kakula witnis ise olgeta ia igat Toarasariamata, Talieta mo Toaralesa hemia long 1884.

Namba 3 witnis-Raymond Marongoe

Witnis istap talem se gret mama blong hem hemi Talieta mo tufala brata blong hem Toarasariamata mo Toaralesa we hemi gret granfata blong Kalmaiere Kalmar. Hemi talem tu se Toarasariamata igret granfata blong Edward Kaloris. Witnis italem se gret granmata blong hem iblong Malasaliu. Witnis istap konfemem tu se baondari blong Emua ifas wetem hemia blong Malasaliu. Witnis italem tu se leit jif Silas Manavilau nao ibin ordenem jif Henry Cyrel Manlaewia. Hem italem tu se gret granfata blong hem Rolland Maserei ibin jif blong Piliura, Pele, mo hem ineva harem mama blong hem italem se Kakula iblong jif Maserei blong Piliura be hemi iharem nomo oli talem long hem se olgeta iblong Malasaliu we Kakula istap insaet. Hemi italem tu se long storian blong hem wetem leit Peter Simon Mariopopongi hem ineva harem se Kakula ipat blong Tanomiala.

Long wan kros-examinesen we ikam long spokesman blong jif Manlaewia se sapos itrue hem ibin deklerem Jif Manlaewia blong rulum ol pipol hem ise 'yes'. Long wan kwesten se sapos Lakelewia hemi brata blong Manlaewia witnis iansa se hem ino save. Long wan kros-examinesen we ikam long spokesman blong famili Maripopongi se Kakula igat hamas farea witnis ise igat wan farea nomo we hemi Christian Farea. Spokesman blong famili Maserei ibin askem witnis sapos hemi save nemem ol ples long Kakula we oli nambarem istap long map mo witnis ise 'yes' mo talem olgeta everiwan. Spokesman blong famili Kalrong iaskem witnis weta hemi gat eniting olsem karen or kokonas long Kakula mo hem iansa se 'yes'. Wan kwesten bakeken se sapos witnis isave nemem wan ples long interia blong Kakula mo witnis italem aot nem ia Tavaleon.

Namba 4 witnis –Kalorib Tom

Witnis ise papa blong hem Tom Henry brata blong Flora we ikarem jif Raymond Marongoe. Gret granmata blong hem wetem jif Marongoe hemi Talieta mo ol brata blong hem igat Toarasariamata we hemi gret granfata blong Edward Kaloris mo Toara Lesa we hemi gret granfata blong Kalmire Kalmar. Witnis ise Rolland Masereitonga hemi gret granfata blong hem mo hem ibin jif long Pilura vilej, Pele long 1909. Witnis italem tu se hem ineva harem papa blong hem italem long hem se Kakula iblong jif Masereitonga be hem ibin harem nomo long papa blong hem se Kakula iblong ol pupu blong olgeta we oli stab long Malasaliu. Hemi talem se long stori we hemi harem long papa blong hem Masereitonga ikam aot long wan islan klosap Nguna we tedei ino mo stap. Hemi talem tu se tedei hemi kam blong difendem kleim ia long saet blong blat laen. Hemi konfemem tu se jif Masereitonga hemi sem jif we orijinol kleimen istap mekem kleim blong hem.

Long wan kros-examinesen kwesten we spokesman blong famili Manlaewia iaskem se Tom Henry we hemi papa blong witnis mo ikam long Malu famili ibin tekem finis wan desisen se jif Manlaewia nao ikastom ona. Long saet ia witnis ise hem ino save. Long narafala kwesten se witnis iman Pele mo hao nao ijoen wetem Malu famili mo kleimem Kakula witnis iansa se hem ikleim long saet blong blat laen. Long narafala kwesten se long kastom blong Efate ol man ino save mekem kleim long ol properti anles oligat wan jifly taetol. Long saet ia witnis ise ol man igat lan blong olgeta and jif ilukaotem baondari. Spokesman blong jif Maserei tu iaskem witnis se sapos hem ifamili wetem Maserei be hem ise 'no'. Long wan kwesten we ikam long spokesman blong famili Kalorong sapos witnis isave talem eni samting we istap long Kakula mo hem iansa se 'napara'.

Namba 5 witnis-Jif Morris Ben Matapanga

Witnis ise hem iwan jif blong Ngurua vilij, Emau. Witnis istap talem se hem bae witnisem nomo wanem we papa blong hem ibin stap talem long hem abaot Kakula island. Hem ise papa blong hem ibin stap long Kakula wetem jif Maripopongi blong Tanmiala wetem dota blong hem Talimaire mo taem ia hem ismol mo stap skul. Witnis italem se Jif Maripopongi ibin talem long papa blong hem se Kakula iblong Toarasariamata, Talieta mo Toaralesa.

Long wan kros-examinesen kwesten we ikam long spokesman blong famili Jif Manlaewia se sapos witnis isave talem yia we papa blong hem ibin gat mo ko long Kakula. Long kwesten ia witnis ise hem ino save. Bakeken spokesman italem long witnis se papa blong hem ineva talem storian long hem se papa blong hem ibin stap long Kakula. Long saet ia witnis ise hem ibin stap forom papa blong hem ibin bon long 1879. Long kwesten se wanem kaen relesensip nao papa blong witnis igat wetem Maripopongi witnis ise hem ino save. Spokesman blong famili Maripopongi iaskem witnis se wanem nao papa. blong hem italem long hem hemi se hem ibin talem se Kakula iblong trifala pipol ia Toarasariamata, Talieta mo Toaralesa.

Famili blong Jif Henry Manlaewia

Spokesman italem se bifo miseneri ikam long not Efate ol pupu blong olgeta oli stap finis. Hemi talem se long kastom blong Efate hemi nomol blong onasip blong lan ifolem blat laen. Hemia ifolem nomo ol paramaon jifs we oli onem taetol blong jif, taetol blong graon nakamal mo pipol. Spokesman italem se long kastom blong Efate bifo oli stap gat inter-marej mekem se oli stap maretem pikinini blong ol unkel. Forom resen ia nao ol pupu blong jif Henry Manlaewia oli mekem se leit Leisau Solomon we hemi gret gran mata blong jif Henry Manlaewia blong tedei imaretem Solomon Manlaewia III, we hemi semtaem granfata blong jif Henry Manlaewia blong tedei. Spokesman istap talem se igat resen whae olgeta imekem se Jif Manlaewia III imas maretem Leisau Solomon. Spokseman italem tu se tedei jif Raymond Marongoe mo Edward Kaloris oli denaem baondari we jif Henry Manlaewia ilukaotem forom olgeta iet oli bin wokboat mo shoem long hem taem we olgeta ibin odainem hem long August, 1996. Spokesman italem se igat plande man tu ibin wokbaot long taem ia. Spokesman italem se taem we ol Miseneri ibin kam ol pipol oli liv olbaot long ol narafala pleses mo ol Miseneri ibin mekem se ol pipol ia oli mas muv ikam daon long Malasa blong harem tejing blong ol Miseneri bifo oli ko long Kakula. Spokesman italem se taem we oli stap long Kakula olgeta ino gat wan jif kasem long 1900 we ibin luk jif Masoe-Manu.Kona ibin ordained olsem jif blong Kakula hemia long Taloa, Nguna. Masoe-Manu-Kona spokesman italem se hem ipupu blong jif Henry Manlaewia we istap tedei. Folem resen ia nao spokesman italem se long kastom blong Efate jif igat autoriti ova long jifs taetol, nakamal mo pipol. Responsibiliti blong hem iblong lukaotem sefti mo graon blong pipol blong hem mo ol pipol ol ino kastom ona long graon ia be oli lan ona we jif nao ikivim raet ia long olgeta. Hemi talem tu se Kalsurai we hemi brata blong jif Charley Luisi or Masoe-Manu-Kona hem nao fast man blong Kakula blong kam bak long mein lan mo setemap wan vilij long poen ia we Paunagisu vilij istap long hem tedei. Long taem ia Kalsurai ibin holem taetol ia Manlaewia mo taem hemi tet pikinini blong hem Yoba nao itek ova olsem Manlaewia II. Taem Manlaewia II itet brata blong hem Solomon Manalewia III nao itek ova mo taem we hem itet Thomas Manlaewia IV nao itek ova. Tedei Jif Henry Manlaewia 5 nao itek ova afta long tet blong Thomas Manlaewia. Spokesman italem tu se jif Masoe-Manu-Kona (Charley Luisi) ibin salem wan pis graon long man ia Henry Taylor we hemi wan trader hemia long yia 1890 mo bakeken long yia 1906.

Fas witness – Jif Henry Manlaewia

Witnis istap talem se hem istap kleimem taetol ia Manlaewia long saet blong blat laen blong mama blong hem mo leit jif Solomon Manlaewia III nao ikivim raet ia long hem. Hem italem se Leisau we hemi granmata blong hem iblong Pele mo brata blong hem Stephen Kaloris mo papa blong tufala hemi Dick Tinapua blong Tongoa. Witnis italem se mama blong hem imaret ikam bak long Paunagisu folem nomo Toktok blong Pastor Tom Kalmaire we hemi unkel blong Stephen Kaloris se wan long Pikinini gel blong hem imas kam bak long Malasaliu blong tekem ples blong mama blong hem we ibin maret iko long Pele. Long saet blong Deed of Sale we ikam aot long 2 December, 1890, witnis ise Charlie Luisi hem nao isalem ples ia Malasaliu long wan trader we hemi Henry Taylor. Hem ise sale ia ibin kam aot bifo migresen ibin tekem ples blong ko long Kakula long 1884. Witnis ise taem we oli stap long Kakula olgeta ites odainem Charlie Luisi long May 11, 1900 long Nguna blong ikam jif blong Kakula mo karem nem ia Masoe-Manu-Kona. Witnis ise ol ples blong pupu blong hem long Kakula hemi sumantano mo sumaniworakavika. Pasis blong olgeta long Kakula hemi Naworano Malasa. Witnis irefe tu long wan document we oli saen long hem long 2 Julae 1987 we isoem se Jif Peter Maripopongi ibin talem long miting se hem wan ino gat raet blong tokbaot graon long Malasa mo document ia jif Joel kalfau blong Moso nao isaenem olsem jeaman mo James Steel blong Siviri olsem Secretari. Long saet blong famili tri blong hem witnis ise Marvatutipua iblong Malasa mo hemi kasin brata blong Jif Manlaewia be ino Lakelewia.

Famili Kalrong ibin askem wan kros-examinesen kwesten se hao nao hemi stap kleimem Kakula witnis ise hem istap kleimem long saet blong blat laen blong jif Manlaewia. Witnis italem tu se hem ibin traem blong tekem everi famili tugeta be olgeta ino wandem. Long saet blong kros-examinesen we ikam long spokesman blong famili Malu se wanem farea nao Marvatutipua ikam long hem hem ise Fare Sairbiri mo witnis ise nakamal blong pupu blong hem long Kakula hemi Silimanu hemia iminim se ismel olsem salwora.

Nambatu witnis-Pastor Daive Kalsaruru

Witnis istap sapotem toktok blong jif Manlaewia forom se everi stetmen mo histri blong hem iklia. Tedei witnis istap talem se ona blong Kakula hemi Jif Manlaewia. Witnis italem se mama blong hem hemi stret nees blong Solomon Manalewia 3 mo hemi kolem pupu long jif Masoe-Manu-Kona. Long saet blong kors-examinesen we ikam long famili Maripopongi se hao nao hemi stap sapotem kleim blong Kakula hemi se long saet blong blat laen mo taetol blong Jif ia Manlaewia. Wan kros-examinesen kwesten tu ikam long spokesman blong familu Kalrong se wanem pruf nao witnis isave soem long Kakula island se Manlaewia ionem Kakula mo long kwesten ia witnis ise igat wan wata well we hemi blong Manlaewia istap long Kakula. Long saet blong kros-examinesen tu we ikam long famil Malu se wanem Namarakiana Charlie Luisi mo Kalsuarai ikam aot long hem witnis ise hem ino save. Long kwesten se jif Manlaewia hem iblong Tariang or Malasa witnis ise hem iblong Malasa. Famili Maserei ibin askem kwesten tu weta Manlaewia igat eni koneksen wetem Maserei blong Pele mo witnis iansa se hem ino save.

Namba 3 witnis – Lynette Morrison

Witnis italem se papa blong hem leit James Morrison mo hem istret nefiu blong leit Solomon Manalaewia. Hem ise hemi sapotem Jif Manlaewia forom se histri mo stori blong hem itru. Witnis italem tu se long saet blong famili tri we Jif Manlaewia imekem hem tu ipat long hem mo hemi kontiniu blong talem se papa blong hem ibin talem long hem se olgeta istret famili we ikam aot long ol pupu blong olgeta we ikam aot long Malasa. Hem italem tu se long 1984 papa blong hem tu ibin saenem agrimen long behalf long tufala pupu blong hem we hemi Solomon Manlaewia mo pasta Tom Kalmaire wetem Mr. Terry O'Neil. Long saet blong kros-examinesen famili Kalrong ibin askem weta papa blong hem istap saenem agrimen ia long behaf blong pupu blong hem we hemi Solomon Manlaewia mo witnis iansa se 'yes'.

Namba 4 witnis-Kirk Kalmaire

Witnis ise hem ipikinini blong leit Albert Kalmaire mo ankle blong hem leit Tom Kalmaire. Hem ise hem isapotem Margaret Naupa blong tokbaot graon forom se Tom Kalmaire nao ikivim raet ia long hem. Hem italem tu se Jif Henry Manlaewia hem igat ful rate ova long Kakula tedei thru long lidasip blong hem. Witnis italem tu se Masongomapula iblong Pele mo hem ibin ko long Kakula olsem wan tija. Long saet blong kros-examinesen we ikam long spokesman blong famili Maripopongi se sapos nem ia Manlaewia oli inheritem witnise ise 'yes'. Narafala kwesten se sapos Masoe-Man-Kona hemi jif blong Kakula forom wanem oli odainem hem long Nguna mo long saet ia witnis ise forom igat plande man long Nguna long taem blong ol miseneris. Long wan kros-examinesen kwesten we ikam long famili Maserei se long saet blong kastom mo Christianity wij wan nao yumi mas folem blong mekem desisen forom graon witnis ise 'kastom'.

Namba 5 witnis – Margaret Naupa

Witnis istap talem se hem idota blong leit Pastor Tom Kalmaire we ibon long Kakula. Papa blong hem hem Toaralesa mo hem iresiden blong Kakula mo itet istap long Kakula. Witnis ise Maripopongi we ijif blong Tanmiala ibin ko long Kakula nomo folem rikwest blong sista blong hem we hemi Turita. Witnis italem tu se folem ol distabances we istap Rev. Peter Milne ibin mekem Masongomapula blong Pele blong kam tij long Kakula afta oli tes odainem jif blong Kakula we hemi Masoe-Manu-Kona. Masoe-Manu-Kona ibin maret be ino gat wan pikinini. Since we Masoe Manu Kona, jif blong Kakula itet ino gat replacemen blong hem kasem tedei. Witnis italem se tedei Jif Manlaewia nomo wetem ol netif blong Malasa mo Kakula oli kastom onas blong Kakula. Witnis italem tu se fas man blong kam bak long paunagisu mo mekem vilij hemi Kasurai we ibrata blong Jif Masoe-Manu-Kona. Hemi se leit Pastor Tom Kalmaire nao italem ol histri ia long hem. Long wan kros-examinesen kwesten we ikam long Kalrong famili se sapos itrue se long 1890 Charlie Luisi isalem graon long Malasaiko long wan trader witnis ise 'yes'. Famili Malu iaskem tu se wanem nao Jif Manlaewia imekem long Kakula blong soem se hem istap long island ia bifo mo witnis iansa se bae oli some ol setolmen long taem blong wokbaot. Witnis ikonfemem tu se papa blong hem mo Stepehen Kaloris ibin agri blong oli bildim joj long Manua. Famili Maserei ibin askem tu sapos Jif Maserei irelated long Jif Manlaewia mo witnis iansa se 'no'.

Famili Maripopongi

Long saet blong famili Maripopongi olgeta istap talem se Kakula istap insaet long baondari blong Tanmiala mo Jif Maripopongi nao hemi paramaon jif blong Tanmiala. Oli talem tu se long 1950s mo 60s olgeta ibin stap usim truck mo tracta blong ko karem copra ikam long mei lan. Oli talem se bifo 1883 Kakula hemi wan empti island mo long 1884 ol miseneries oli bin movum ol pipol aot long Malasa mo ko long Kakula. Bifo oli muv ol man ibin muv aot long ol vilijes mo kam stap long baondari blong Tanmiala we oli kolem Suman Namalingo mo Suman Napua. Olgeta ise Malasa ino wan ancient vilij we igat jif be hemi wan setelmen nomo we ol miseneries oli sitemap. Long taem blong migresen jif Maripopongi ino bin ko long Kakula mo afta ol famili blong hem ibin pasuedem hem blong ko. Taem oli stap long Kakula igat 12 jifs oli bin ordained mo Charlie Luisi ibin ordained olsem Masoe-Manu-Kona mo jif blong Kakula. Olgeta ise Masoe-Manu-Kona hemi wan sabodinet jif long Taripoaliu. Oli talem tu se igat samfala ples long Kakula we pupu blong olgeta ibin nemem bifo 1884 mo ol nems ia istap iet tedei. Olgeta italem tu se olgeta iagensem kleim we ol narafala patis oli mekem long saet blong clansip or naflak blong onem lan forom Roimata ino statem samting ia blong onem graon be blong kipim pis bitwin ol diferen klan.

Fas witnis – Kennedy Kalfau

Witnis istap talem se hem ikam long kot blong witnisim se leit Peter Maripopongi hemi kastom ona blong Kakula. Hemia folem resen se famili tri blong hem itru mo blat laen blong hem ikam long taem finis ikam samwea 600 yias ako. Narafala resen nao se ancestral traeb blong Peter Maripopongi ol man oli save gut olgeta long interia mo kostal eria we Kakula istap long hem. Witnis italem tu se ol narafala samting we ol narafala patis oli stap tokbaot ino gat long histri blong Kakula eksept baondari blong Tanmiala mo ol kastom releted objeks. Witnis italem tu se ol narafala pipol oli tes muv ikam long Malasa be Maripopongi hem fas jif we iko long Kakula mo hem ibin ko wetem kastom blong hem be ino mane.

Long saet blong kros-examinesen we ikam long spokesman blong famili Jif Manlaewia se hao nao witnis ise Kakula iblong Maripopongi witnis ise hemia folem blat laen, baondari mo hem nomo jif we ibin muv iko long Kakula. Witnis italem tu se bifo ol pipol iko long Kakula oli bin stap long Suman Namalingo mo Suman Napua. Long saet blong kwesten we ikam long famili Malu se sapos witnis isave talem who long ol famili tri blong olgeta nao ibin muv iko long Kakula witnis iansa se Jif Matarimau Maripopongi ibin ko long Kakula igat 2 jifs tu ibin ko wetem hem mo tufala ia hemi Manlaewia mo Mansarabe. Long saet blong kwesten se forom wanem Minista Kalpokas imas saen long pepa long 1984 be ino Peter Maripopongi witnis ise forom igat dispute istap long Kakula. Long saet blong kwesten se sapos igat kastom nakamal long Kakula witnis ise ino gat nakamal long Kakula. Spokesman blong famili Maserei ibin askem wan kwesten tu se sapos itru se sista blong Maripopongi nao ibin tekem hem iko Kakula witnis ise 'yes'. Long saet blong kwesten se sapos witnis ibiliv long Act of Sale witnis iansa se 'yes' be ino afta long independens. Witnis italem tu se ol jifs oli odainem olgeta long Kakula iblong luk afterem ol pipol nomo be ino blong onem graon.

Nambatu Witnis-Pielau Simon

Witnis istap konfemem nomo long kot se hem ibin maretem Peter Simon kastom ona blong jifli taetol Maripopongi long 1961. Hemi talem tu se Peter Simon ibin talem long hem se mama blong hem (Peter Simon) ibin stap bifo long Kakula. Witnis italem tu se ol samting blong Maripopongi long Kakula hemia ol kokonas. Long saet blong famili Manlaewia Spokesman ibin askem kwesten se sapos hemi save talem whu ia nao ol las man blong livim kakula mo Witnis ise papa mo mama blong Peter Simon Maripopongi. Bakeken spokesman iaskem sapos witnis isave faenem krev blong Maripopongi long Kakula mo witnis iansa se 'yes'. Famili Malu ibin askem kwesten se sapos witnis isave talem wan nakamal long kakula mo witnis ise 'yes' be hem ino save talem wea long kakula nao locasen blong nakamal istap. Hem italem tu se hem ino save ol nems blong solwora mo ol poen mo pasis we oli stap long Kakula. Long saet blong famili Kalrong spokesman ibin askem se wanem kaen relesensip nao witnis igat wetem jif Marongoe mo witnis ise hemi brata blong hem. Taem we spokesman iharem witnis italem olsem hemi askem hem se forom wanem nao hem wetem brata blong hem ia imekem seperet kleim. Long kwesten ia witnis ise hem ifolem hasban blong hem. Witnis italem tu se mama blong hasban blong hemhemi Talimaere mo hem iblong Tanmial.

Namba 3 witnis-Eric Tom

Witnis ise hemi ikam long kot blong witnesem se Kakula island hemi kastom property blong Peter Simon Maripopongi. Resen forom se hem isave gut ol kastom mo plese blong hem. Witnis ise ol histri ia papa blong hem nao italem long hem. Hem ise pupu blong hem ibin planem sam kokonas mo digim wan well long Kakula we istap iet tedei. Witnis italem tu se igat ples we pupu blong hem ibin stap bonem lime blong joj haos istap long Kakula. Hemi kivim tu ol nems blong ol pasis we istap long Kakula.

Long saet blong kros-examinesen kwesten ikam long spokesman blong famili Manlaewia se hao nao witnis isave se Kakula iblong Maripopongi witnis ise forom Kakula istap insaet long baondari blong Tanmiala. Spokesman blong famili Kalrong ibin askem witnis se wanem kaen relesensip nao hemi gat wetem Margaret Naupa witnis ise hem iwan mama blong hem.

Afta spokesman iaskem se forom wanem nao bae oli raorao witnis ise hem ikam long kot ino blong rao. Spokesman iaskem tu se sapos witnis isave soem eniting we isave pruvum se Maripopongi iblong Kakula witnis ise igat krev blong Maripopongi istap.

Namba 4 witnis-Kalfau Johnson

Witnis istap talem long kot se hemi kam blong witnis se Kakula iblong Maripopongi forom se hem nao ibin litim ol heaten man iko long Kakula mo tu se Kakula iwan island insaet long baondari blong Tanmiala. Long saet blong kros-examinesen we ikam long spokesman blong Manlaewia se hao nao witnis ireleted long Maripopongi witnis ise blat laen. Narafala kwesten we spokesman blong Malu famili iaskem nao se long Efate long wan namarakiana hamas dancing graon bae istap long hem witnis iansa se wan (1). Witnis ikonfemem tu se long taem blong odinesen blong jif Mantaura long 1922 Jif Taripoaliu ibin searem sam graon. Long saet blong kros-examinesenwe ikam long Kalrong famili se forom wanem witnis istap usim tufala nem ia Tanmiala mo Suasu witnis ise hemi usim Suasu forom Peter ikam aot long hem thru long mama blong hem.

Famili Kalrong & Famili Tanomiala (Vamele Famili)

Long saet blong histri blong famili Vamele spokesman ise Kakula ineva gat man long hem kasem we ol miseneri oli kam. Hemi se Kakula istap insaet long baondari blong Tanmiala mo tedei igat evidence olsem ol frut tris mo ston isoem baondari blong Tanmiala. Hemi talem tu se igat ol olfala krev tu istap long baondari ia mo olgeta istap usim waet faol blong mekem kasom iko long Nasu. Hemi se jif Maripopongi nao hemi het jif blong Tanmiala mo igat sam narafala jifs bakeken we oli wok anda long hem olsem Matarimau, Manapanga, Namalikokona, Masemanti, Masanga, Matoatau, Masemansarabe, Manavilalu, Manlaewia, Maripokae mo Marmasoe. Jif Maripopongi, spokesman italem se hem igat 2 pikinini we oli tet taem we hemi muv iko long Kakula wetem waef blnog hem, Erawo. Namele wetem Erawo tufala imuv olsem miseneri iko long Malekula mo kam bak long Kakula long yia 1895. Long taem ia spokesman italem se ol pipol ikam bak long mein lan mo setel long Paunagisu mo olgeta ino wandem ko bak long ol vilijes blong olgeta mekem se tedei igat difdifren pipol oli live long Paunagisu. Spokesman italem se ol pipol blong Tanmiala oli kaen blong kivim olgeta graon blong wok long hem.

Fas witnis – Kalorong Kaltonga

Witnis istap talem se hemi blong Tanmiala mo hem isave gut baondari blong plesia. Hemi talem se Maripopongi nao hemi jif blong Tanmiala mo igat ol narafala jifs tu oli wok anda long hem. Long wan statemen blong hem we hemi producim long kot hemi se igat wan document we jif Maripopongi ibin saenem bifo long 6 Julae we isoem se hem nao ijif blong Malasa. Documem ia oli bin mekem long behalf blong Presbyterian Church of Victoria Trusts Corporation. Long wan kros-examinesen kwesten we ikam long famili Manlaewia se sapos jif Manlaewia istap iet olsem jif witnis ise 'yes' mo talem se hem iwok anda long jif Maripopongi. Long saet blong nem ia 'Malasa' witnis ise nem ia iminim tapu ples. Wan kwesten tu ikam long famili Maripopongi se sapos witnis isave talem wea nao baondari blong Kakula ikasem long solwora mo long saet ia witnis ise ikasem long nawora salea. Witnis italem tu se hemi ino save talem eni kastom ples long Kakula be hemi save nomo se igat Karen long Kakula. Witnis italem tu se Erewo mo Namele tufala ibin kam bak long Kakula be oli no tet long Malekula.

Namba 2 witnis – Toara Kaloribe

Witnis istap talem se olgeta Vamele Famili olistap kleim forom nomo se Kakula istap insaet baondari blong Tanmiala mo olgeta istret pipol blong Tanmiala. Hemi talem tu se olgeta istret blat laen blong ol graon long Tanmiala mo olgeta narafala man oli tes muv ikam long narafala ples or island mo liv long Paunagsu afta ol miseneris oli kam. Long wan kros-examinesen we ikam long spokesman blong famili Manlaweia se sapos witnis isave nemem wan kastom site blong Kakula witnis ise hem ino save mo tu se hem ino save wea ples nao krev blong Namele mo woman blong hem Erewo. Long saet blong kwesten se sapos witnis isave talem hao nao long Kastom blong Efate oli stap kleimem jifli taetol weta long blat laen or naflak witnis ise long blat laen. Witnis italem tu se papa blong hem ineva planem kokonas long Kakula. Long saet blong Malu famili spokesman ibin askem witnis sapos igat nakamal long Kakula mo witnis ise 'no'.

Namba 3 witnis-Robea Obed

Witnis istap talem se hem istap sapotem ol stetmen we ikam aot blong sapotem kleim blong olgeta forom Kakula mo tu se olgeta nao oli tru pipol blong Tanmiala. Hemi rekonfemem se olgeta istret blat laen long graon long Tanmiala we Kakula tu istap insaet. Hemi talem se folem histri blong olgeta olgeta inona blong Kakula long taem finis ikam kasem tedei. Long kros-examinesen we ikam long spokesman blong famili Manlaewia se sapos witnis isave krev blong Erewo mo Namele witnis ise hem ino save. Hem italem tu se Kakula ibin gat wan vilij nomo. Long wan kwesten we ikam long long famili Maripopongi se hao nao witnis istap kleimem Kakula we hem ino gat wan samting long hem witnis ise hem ikleim forom se Kakula istap insaet long baondari blong Tanmiala. Long wan kwesten we ikam long famili Malu se sapos witnis isave talem nakamal blong hem long Tanmiala mo hemi ansa se nakamal blong hem hemi Launaneve. Witnis italem tu se olgeta ikleim long 2 nem be olgeta ino seperet.

Namba 4 witnis – Marcel Tavimasoe

Witnis ikam witnis se ibin pem pis graon long olgeta blong Tanmiala we oli famili Vamele. Witnis italem se forom resen ia nao hem istap sapotem olgeta mo talem se olgeta nao oli tru kastom ona long Tanmiala mo man we oli stap long Punangisu tedei ogeta ites kam nomo. Long wan kros-examinesen kwesten we ikam long famili Manalewia se sapos witnis isave talem se waef blong hem ireleted long jif Manalewia or no witnis ise hem ino save mo hem italem tu se hem ino save wea baondari blong Tanmiala.

Namba 5 witnis – Kalten Willie

Witnis ikam blong witnis long kot se papa blong hem ibin kam aot long Mataso mo pem wan pis graon long Vamele famili hemia long Tanmiala. Forom resen ia nao witnis istap talem se hem isapotem famili Vamele se olgeta nao oli tru kastom ona blong Kaula island. Long saet blong kros-examinesen we ikam long famili Manlaewia se wanem nao witnis iplanem long graon ia hemi se kokonas.

Wokabaot long Kakula

Afta we kot ibin harem ol witnises kot ibin tekem janis blong visitim Kakula. Resen blong visit hemi blong ol patis oli shoem ol evidence we oli stap talem long kot. Semtaem tu hemi kivim long kot sam idia blong baondari blong graon ia mo ol samting we istap insaet. Hemia nao observasen blong kot long taem blong wokabaot.

Famili Maserei

Long stat blong exploresen famili Maserei olgeta ino gat plande samting blong soem. Olgeta ibin soem wan pasej we oli kolem Nawora ni peseruru mo hemia istap long noten most pat blong Kakula. Long ples ia nao oli talem se Jif Maserei istap kam soa long hem taem we hemi aot long Pele. Long ples ia tu oli soem wan poem we istap long Pele we oli kolem fatu ni peseruru mo Tavaleo Kakula. Long saot-west pat long island oli soem wan ples we oli kolem Napara ni peseruru.

Famili Malu

Long saet blong famili Malu olgeta ibin shoem ol nems blong ol pasis we oli bin talem long kot. Oli shoem tu wan ples we wan masta long bifo ibin pulum fanis ikrosem long est ko kasem long wes saet blong island. Oli shoem tu sam krev we istap mo agri se wan long ol krev ia hemi blong Maripopongi mo blong Toara Lesa mo Toara Sariamata. Oli shoem tu wan faodesen blong olfala joj blong bifo. Oli shoem tu ol pasis mo ol nems blong ol pleses.

Famili Peter Maripopongi

Olgeta ibin shoem ol pasis mo nems blong ol pleses we itsap. Oli shoem tu wan ples we igat hol mo talem se ples ia Maripopongi ibin stap bonem ol lime bifo blong mekem cimen blong joj haos. Klosap long hol ia oli shoem wan faodesen blong jaj haos. Oli bin shoem tu wan krev we ol narafala patis tu oli agri se hemi blong.jif Maripopongi. Olgeta ibin shoem tu wan well we istap mo talem se Maripopong nao ibin digim mo mekem well ia.

Famili blong Jif Henry Manlaewia

Olgeta ibin shoem ol pasis mo ol nems blong ol pleses we oli bin talem long kot. Oli bin shoem tu ples we wan waetman ibin pulum fanis long est ko kasem wes saet blong island ia. Oli shoem tu krev blong jif Mase-Manu-Kona mo wan ples we oli kolem Sumaniaworakavia. Ples ia oli shoem ol sel we ol man oli bin kakai mo talem se plesia iblong kam tugeta long taem blong miting or selebresen.

Famili Kalrongo & Famili Tanimiala (Vamele)

Long taem blong wokabaot ol famili ia oli no toktok tumas. Olgeta oli stap folem nomo wanem we ol narafala patis oli stap talem. Hemia forom nomo se olgeta istap tokbaot semfala histri we famili Maripopongi oli stap tokbaot.

Famili tri blong famili Manlaewia mo Malu

Long saet blong famili tri kot iluk se famili blong jif Henry Manlaewia we istap tedei mo famili Maju olgeta iwan famili nomo. Sapos yumi lukluk gut olgeta everiwan oli kam aot long trifala pupu blong olgeta we hemi Toarasariamata, Toaralesa mo Talieta. Long saet blong Toarasariamata hem ibin maretem Lelsaruru mo bonem Toumanu. Toumanu imaretem Dick Tinapua mo bonem Leisau mo Steven Kaloris. Leisau imaretem Solomon Manalewia mo bonem Anne mo Anne imareten, Cyrel mo bonem Henry Manalewia we hemi jif blong Paunagisu tedei. Kaloris sista blong hem stret hemi Leisau mo hem ibin maretem Janet mo bonem Edward Kaloris we ibin witnis long kot forom lan kes ia. Long saet blong Titus Taripu we hemi spokesman blong Malu famili stret ankel blong hem nao Edward Kaloris forom se stret sista blong Edward Kaloris we hemi Nelly nao ibonem hem. Long saet blong witnis Raymond Marongoe kot ifaenem aot se hem ikam aot long sista blong tufala ia we hemi Toarasariamata mo Toaralesa mo nem blong hem hemi Talieta. Talieta imaretem Vakalorisu mo bonem Leinasei mo Leinasei imaretem Rolland Maseretonga mo bonem Flora. Flora imaretem Morris mo bonem Raymond Marongoe. Mo long saet blong Tom Kalorib stret brata blong Flora we hemi Tom hem nao, imaretem Maina mo bonem Tom Kalorip. Mo long saet blong witnis Kalmaire Kalmar stret anti blong hem hemi Margaret Naupa we hemi spokesman blong Jif Manlaewia Mo papa blong hem Keith mo mama hemi Dora. Stret pupu blong hem hemi Pastor Kalmara mo pastor Kalmara papa blong hem hemi Toaralesa. Ol man we kot istap mentionem nems blong olgeta ia hemia olgeta we iwitnis long kot mo sem tinting ia bae karem everiwan we oli gat koneksen wetem Toarasarimata, Toaralesa mo Talieta. Long saet blong jif Manlaewia olgeta ikam part blong blat laen blong Toarasarimata, Toaralesa mo Talieta taem we Leisau imaretem Solomon Manalewia mo bonem Anne mo Thomas Manlaewia. Sem blat ia iet Anne ibin pasem iko long Jif Henry Manlaewia we istap jif tedei long Paunagisu. Forom resen ia nao kot istap lukluk se Jif Manlaewia igat blat we ikam long saet blogn ol Manlaewia famili mo hemia we ikam aot long Toarasariamata, Toaralesa mo Talieta.

Famili tri blong Jif Maserei

Alick Tamara we hemi fas witnis blong kes ia hemi stret blat blong Jimmy Maserei we isalem Kakula iko long Mcloud mo hemia ikam aot thru long blat laen blong woman. Jimmy Maserei imaretem Leimarosa Joe Masonmapula mo bonem Leimatuk. Leimatuk imaretem Fred Simion mo bonem Dolcy mo Dolcy imaretem Tamara Manses Masentano mo bonem Alick Tamara. Long saet blong witnis John Roy kot ino save talem eni samting long hem forom nem blong hem ino kam aot long famili tri blong Maserei.

Famili tri blong Peter Maripopongi

Long saet blong famili tri blong Peter Maripopongi kot ino save folem gut forom iluk olsem olgeta istap presentem blat laen blong ol jifs nomo. Wanem we kot iwandem hemi famili tri we isoem hao nao ol patis oli releted iko long Jif Maripopongi blong kleimem raet ia long hem.

Famili tri blong Vamele famili

Long saet blong Vamele Jif Maripopongi stret brata blong hem hemi Namele mo Kalrong we ibin witnis long kot stret pupu blong hem nao hemi Namele. Namele ibonem Kalomele mo Kalomele ibonem Kalorip we hemi papa blong Kalrong we olgeta istap kleim tedei se hemi karem nem ia Maripopongi. Long saet blong Toara Kalorib, wan witnis we ikam long kot, kot ino save talem wanem relesensip nao hemi gat long famili tri forom se olgeta ino soem hem long famili tri blong olgeta. Hemia isemak tu long witnis, Robert Obed. Ol narafala witnisis olsem Kalten Willie mo Marcel Tavimasoe olgeta ino gat eni koneksen nating long famili Maripopongi.

Wanem nao lukluk blong kot long ol evidence ia

Long lukluk blong kot Kakula ineva gat man long hem kasem taem we ol miseneries oli kam long 1883 mo 1884. Forom resen ia long lukluk blong kot se ino gat man isave kleim se hem nao hemi raet ona blong Kakula.

Resen forom se ol man we oli bin ko long taem blong ol miseneries ol ino ona blong Kakula be olgeta oli kam long difdifren pleses antap long bush klosap long ples ia we yumi kolem tedei se Paunagisu. Olgeta pipol ia oli bin ko nomo blong lanem fasin blong Christianity mo wanem we kot ibin luk long taem blong wokbaot hemia ino minim se olgeta oli lan ona long Kakula. Tedei igat plande pleses long Kakula we yumi save luk ol olfala haos, well, nasara mo ol krev we isoem long yumi se ol pipol ia oli bin stap long hem bifo be ol samting ia ol ino reli soem long kot se olgeta ia nao oli lan ona forom se olgeta oli difidifren pipol we oli stap long taem ia. Sapos iolsem wanem nao kot isave mekem blong jadgem kes ia. Hemia nao isiu we kot imas tokbaot.

Kastom blong Efate

Long saet blong kastom blong Efate jif nao hemi lukaotem ol graon we ol man blong hem oli stap insaet be ol graon ia jif ino onem be ol man we oli wok long graon ia nao oli ona long hem. Fasin blong lukaotem ol pipol olsem iminim se wan wan jif oli gat baondari blong olgeta we oli lukaotem mo wan jif long narafala baondari ino save kam insaet long baondari blong wan narafala jif. Sistem ia idiferen long Shepherd grup we ilukim wan jif we ikarem nem blong jif mo nem ia imas relet long wan pis graon. Hemia iminim se jif nao ionem graon.

Wanem nao lukluk blong kot long ol evidence blong famili Maserei

Long ol evidence we kot ibin harem long saet blong Jif Maserei iluk olsem olgeta oli tokbaot plande nao wanem we wan Franis kot ibin desaed long hem long 1930 hemia blong rejisterem Kakula unda long raet blogn SFNH folem wan Akt of Sel we ibin happen bitwin Jimmy Maserei mo MacLeod long 1884. Wan samting we kot imas tekem akaon long hem hemi ol rabis fasin we ol waetman oli stap mekem long ol man Vanuatu bifo taem we oli stap wandem pem graon mo hemia yumi everiwan long Vanuatu yumi save gut. Wanem ihapen long sip long taem ia ino gat evidence long saet ia be yumi save nomo se Jimmy Maserei ibin salem Kakula long taem ia.

Wanem nao lukluk blong kot long ol evidence blong famili Malu

Long saet blong famili Malu kot ifaenem aot se olgeta itoktok plande nao long saet blong baondari ia we oli kolem Malasaliu we oli kleim se Kakula istap insaet. Nem ia Malu hemi wan naflak yam mo olgeta istap talem se olgeta istap kleim folem ol blat laen blong ol pupu blong olgeta. Long saet ia koti wandem talem se long kastom blong Efate man ino save kleimem graon long saet blong naflak forom se naflak hemi wan system we Roimata ites mekem blong kipim pis istap oltaem long Efate bitwin ol difren traebs. Long lukluk blong kot se olgeta Malu famili olgeta istap kleim long saet blong blat we ifolem matrilineal mo patriliniam saet. Folem tingting ia kot iwandem talem se long kastom blong Efate man ikleimem graon folem blat laen blong man be ino blat laen blong woman. Olgeta italem tu se Kakula istap anda long baondari long Malasaliu mo hemia iminim se Malasaliu imas gat wan jif blong hem forom se long kastom blong Efate everi baondari imas gat wan jif blong olgeta. Malu famili ino bin mekem iklia se baondari blong Malasaliu whu nao jif ibin stap lukaotem kam kasem tedei. Olsem long saet blong woman kot italem finis se man ino save kleimem graon folem woman be long saet blong man olgeta ino specifaem gut long famili tri blong olgeta hao nao raet ia ipas ikam taon kasem ol generesen we oli stap mekem kleim ia tedei. Naoia we istap famili tri blong olgeta isoem se jif Henry Manlaewia we hemi mekem wan seperet kleim long kes ia hem tu igat everi raet long kleim ia we olgeta istap mekem forom se olgeta everiwan oli kam long sem pupu we hemi Toarasariamata, Toaralesa mo Talieta.

Wanem nao lukluk blong kot long saet blong famili blong Jif Henry Manlaewia

Long saet blong Jif Henry Manlaewia hemi ibin tok plande long saet blong baondari we oli kolem Malasa mo hemi kleim se Kakula istap insaet long baondari ia. Long kastom blong Efate taem we man ikleimem graon anda long wan baondari hemia iminim se baondari ia imas gat wan jif we istap lukaotem ol pipol insaet long baondari ia. Kwesten nao se sapos jif Manlaewia hemi jif blong Malasa tedei or wanem yumi save kolem tedei se Paunagisu. Long lukluk blong kot jif Henry Manlaewia imas pruvum long kot ia se hem nao ijif blong Malasa. Forom resen ia kot imas lukluk gut long histri blong hem blong faenem aot weta hemi gat eni koneksen long baondari ia thru long ol pupu blong hem ikam kasem hem tedei. Long ol evidence we ikam long kot kot ifaenem aot se igat trifala document we hemi impotant tumas blong ansarem kwesten ia. Faswan hemi wan Deed of Sale we ibin tekem ples long yia 2 Disemba, 1890. Wanem hemi impotent long plesia nao se Charlie Luisi nao ibin salem wan pis graon long Malasaliu iko long wan waetman we nem blong hem Henry Taylor mo graon ia istap long Paunagisu. Sem Charlie Luisi ia nao ol miseneri oli odinemem hem ikam jif blong Kakula mo karem nem ia Masoe Manu Kona long Mai 11, 1900. Namba 2 documen we impotent blong ansarem kwesten ia hemi wan desisen we ol jifs blong Not Efate oli mekem hemi long yia 2 Julae, 1987. Long miting ia ol jifs oli lukluk gut long graon Malasa we hemi wan taetol No. 152 mo deklearem se graon ia iblong Manalewia. Long sem miting ia tu Jif peter Maripopongi ibin deklearem hem wan se hem ino gat raet blong tokbaot graon blong Malasa. Nambatri document we impotent blong ansarem kwesten ia hemi wan document we ikam long Ministri blong lan. Long saet ia Ministri ibin isuim wan pepa blong ol Kaonsel blong ol jifs oli faenem aot se whu nao kastom ona blong graon long Paunagisu (Malasa) we eria kaonsel hetqwata istap long hem. Taem we ol jifs ibin staon oli faenem se Solomon Manlaewia nao hemi kastom ona long plesia mo igat 7 jifs we oli saen long pepa ia. Long lukluk blong kot folem ol documents ia jif Manlaewia ibin exist long taem bifo ikam long baondari blong Malasa.

Wanem nao lukluk blong kot long Famili Peter Maripopongi

Long saet blong famili Maripopongi baondari blong hem hemi Tanmiala. Tanmiala hemi bigfala baondari mo insaet long bigfala baondari ia igat sam smol smol baondari tu we istap insaet olsem Malasa mo Suasu. Wanem we kot iharem nao se Maripopongi hemi bifala jif blong Tanmiala mo hem tu ibin ko long long Kakula afta we sista blong hem Turita ibin tekem hem blong ko mo kam wan Christian. Jif Maripopongi ibin tet long Kakula mo oli berem hem istap long island ia. Long saet blong famili tri blong Maripopongi olgeta ino mekem iklia hao nao olgeta we oli stap mekem kleim ia tedei oli releted long Maripopongi. Oli bin soem tu blat koneksen blong Maripopongi wetem Manlaewia be oli no soem iklia hao nao relesensip ia ikonek. Long lukluk blong kot famili tri blong Maripopongi hemi stap soem nomo ol laen blong ol jifs ikam be ino ol extended famili blong Maripopongi we iko konek wetem ol jifs ia mo ol extended famili we oil stap mekem kleim ia tedei.

Wanem nao lukluk blong kot long famili Kairongo mo famili Tanmiala (Vamele)

Long saet blong famili Vamele olgeta ino bin toktok plande long taem blong wokabaot long Kakula. Olgeta istap kleim se jif Maripopongi nao hemi het jif blong baondari ia Tanmiala mo Tanmiala hemi bigfala baondari. Oli talem tu se insaet long Tanmiala igat smol baondari we wan wan jif oli lukaotem. Long saet blong famili tri blong Maripopongi oli soem se stret brata blong Maripopongi hemi Namele mo stret sista blong hem Turita. Maripopongi igat tufala pikinini be tugeta itet mo Turita ino gat pikinini. Ol famili Vamele tedei oli stap kleim folem blat laen we ipas ikam taon long saet blong Maripopongi wetem brata blong hem Namele. Long lukluk blong kot tufala famili ia Peter Maripopongi wetem Vamele olgeta istap kleim anda long wan famili nomo we hemi Maripopongi. Forom se famili Peter Maripopongi ino bin producim wan klia famili tri mekem se kot ino save talem wea ples nao tufala famili ia oli konek.

Samari blong ol evidence we kot ibin harem

Blong mekem jadgmen long kes ia kot imas lukluk mo skelem gut ol evidence we ikam aot. Fas samting we kot iwandem talem nao se Kakula hemi wan island we ino bin gat man long hem bifo ikam. Ol rekot we yumi gat mo hemia we everi pati oli agri long hem nao se ol man oli tes ko long island ia long 1883 mo 1884 hemia taem we ol Miseneris oli kam wetem kospel blong Jisas Kraes. Forom resen ia mbai yumi save talem se Kakula bifo long 1883 mo 1884 ino gat wan man or famili ionem. Iminim tu se ol man we oli bin ko stap long hem long taem blong ol Misineries ol ino lan ona tu forom se olgeta everiwan oli kam aot long mein lan long ol baondris we tedei oli tap kolem Tanmiala, Malasa mo Suasu.

Kot ia ifaenem aot se Tanmiala hemi bigfala baondari mo insaet long baondari ia igat ol narafala baondari we oli stap olsem Malasa mo Suasu. Kwesten istap se sapos Kakula hemi wan island we ino gat man long hem kasem 1883 mo 1884 taem we ol miseneries oli kam wea nao ol man ibin stap liv bifo. Long saet blong evidence we kot iharem ol man ia olgeta ibin stap long mein land blong Efate. Olgeta ia oli kam aot long ol baondries olsem Tanmiala, Malasa mo Suasu. Forom resen ia nao long lukluk blong kot se mbae ino tru se Kakula hemi blong ol man we oli liv long Tanmiala or oli liv long Malasa or long Suasu nomo. Resen forom se ol baondris ia oli wan eria nomo mo ino gat evitence blong talem se ol man Tanmiala nao oli liv long Kakula bifo or ol man Malasa or Suasu nao oli liv long Kakula bifo. Kot ifaenem aot tu se ol famili tris blong ol patis mo evidence we ikam aot isoem se olgeta patis oli sem famili nomo hemia long saet blong blat laen mo inta-marej we itel ples long ol yias we ikam.

Folem tingting ia kot iwandem mekem sam obsevasen we iko olsem:

(a) se long ol yias we ikam kasem 1883 mo 1884 ino gat man iliv long Kakula island.

(b) se ol man we ol ibin muv aot long mein lan long 1883 mo 1884 mo ko stap long Kakula olgeta oli kam aot long mein land Efate long ol baondaris we tedei oli kolem Tanmiala, Malasa mo Suasu.

(c) se baondaris olsem Malasa mo Suasu tufala istap insaet long bikfala baondris ia we hemi Tanmiala.

(d) se ino gat pruv blong talem se ol man Tanmiala nao oli onem Kakula mo hemia isemak wetem ol man we oli liv long Malasa mo Suasu

(e) se ol famili tri mo evitence we ikam long kot isoem se ol patis oli famili nomo thru inta-marej mo paternal mo maternal reilesensip.

Dekleresen

Folem ol resens ia kot imekem ol dekleresens we iko olsem:

(a) se famili blong Jif Masarei blong Pele Islan we hemi orijinol kleiman olgeta ikam kastom ona blong Kakula island mo olgeta igat raet blong nekosiet wetem eni investas or ol narafala man blong divilopem Kakula island mo raet ia inogat man isave tekem aot.

(b) se famili blong Jif Manlaewia wetem ol traebs blong hem olgeta ikam kastom ona long Kakula island mo olgeta igat raet blong nekosiet wetem eni investas or ol narafala man blong divilopem Kakula island mo raet ia inogat man isave tekem aot.

(c) se famili Peter Simon Maripopongi blong Paunagisu vilej olgeta ikam kastom ona blong Kakula island mo olgeta igat raet blong nekosiet wetem eni investas or ol narafala man blong divilopem Kakula island mo raet ia inogat man isave tekem aot.

(d) se famili Kalrongo mo Tanmiala (Vamele) blong Paunagisu vilej olgeta ikam kastom ona blong kakula island mo olgeta igat raet blong nekosiet wetem eni investas or ol narafala man blong divilopem Kakula island mo raet ia inogat man isave tekem aot.

(e) se famili Malu blong Paunagisu vilej olgeta ikam kastom ona blong Kakula island mo olgeta igat raet blong nekosiet wetem eni investas or ol narafala man blong divilopem Kakula island mo raet ia inogat man isave tekem aot.

(d) se ol patis we kot ideklerem olgeta antap se olgeta ikastom ona blong Kakula island olgeta igat 2 manis blong sitemap wan Asosiesen we mbae olgeta nomo ites talem aot nem blong hem.

(e) se ol membas blong Asosiesen ia imas kam aot long everi patis we kot ibin deklerem olgeta olsem lan ona blong Kakula

(f) se wok blong Asosiesen ia hemi blong karem aot ol interes blong ol patis we oli deklerem olgeta olsem kastom ona blong Kakula

(g) se ol exekutifs mo fasin blong hao Asosiesen mbae wok hemia mbae Asosiesen ites mekem folem ol interes blong ol patis

(h) se eni mane we ol investas oli pem iko long trast akaon blong Kakula long taem bifo ikam kasem tedei, sapos igat, mane ia mbae ikam property blong olgeta we kot ideklerem olgeta olsem kastom ona blong Kakula island mo Asosiesen we mbae oli sitemap hem nao mbae dil wetem mane ia olsem we ol patis mbae oli talem.

(i) se anda long s22(1)(a) blong Island Kot Act ol patis oligat 30 deis blong apil iko long Supreme Kot sapos ogleta ino hapi long desisen blong kot ia.

Dated at Paunagisu this 4 day of November. 2005